06 12 2018
კომპანია რონიკოს გენერალური დირექტორის ბ-ნ როლანდ ჯავახიას ინტერვიუ ყოველწლიურ გამოცემაში "სახე(ლ)ები” - Faces&Names
ნახვა (31)
კომენტარები (0)


როლანდ ჯავახია:

"შეგრძნება მაქვს, რომ მთავარს ახლა ვიწყებთ"

 ყველაფერი ერთ სივრცეშია, მარტივად და კომფორტულად: მომხმარებელს ადგილზე ხვდება ოფთალმოლოგი, რომელიც თანამედროვე იაპონური აპარატურის დახმარებით, მაქსიმალური სიზუსტით ახდენს მხედველობის დიაგნოსტიკას და ადგენს რეცეპტს. კონსულტანტი, რომელსაც უამრავი ტრეინინგი აქვს გავლილი და ზუსტად იცის თავისი საქმე, რეცეპტის მიხედვით პროფესიონალურად შეძლებს სასურველი ჩარჩოსა და სასათვალე ლინზის შერჩევას. შემდეგ ინფორმაცია მიდის ლაბორატორიაში, რომელიც ასევე ულტრათანედროვე აპარატურით არის აღჭურვილი და აქვე, პაციენტის ინდივიდუალური პარამეტრების გათვალისწინებით, მზადდება ნებისმიერი სირთულის სათვალე. მსგავსი პროცესი ჩვეულებრივი ყოველდღიურებაა „რონიკოში“. როგორც მისი დამფუძნებელი როლანდ ჯავახია ამბობს, აქამდე მისვლას წლები და დიდი შრომა დასჭირდა. „დღეს თქვენ რომ მითხრათ, რომ გსურთ ლონდონში ან ნებისმიერ სხვა ადგილას რომელიმე მაღაზიაში არსებული კონკრეტული სათვალე, ჩვენ შეგვიძლია, ის უპრობლემოდ გაგიჩინოთ. რონიკოსთვის დღეს ყველაფერი ხელმისაწვდომია. ნებისმიერი მწარმოებელი სიამოვნებით თანმხდება ჩვენთან თანამშრომლობას, რაც ძალიან დიდი მონაპოვარია.“

ამ მონაპოვარს ზუსტად იმდენი დრო დასჭირდა, რამდენიც - საქართველოში ოპტიკური ინდუსტრიის განვითარებას. „რონიკო“ 23-წლიან ისტორიას ითვლის, თუმცა როლანდ ჯავახიას იდეა გაცილებით ადრე გაუჩნდა, როდესაც ჯერ კიდევ სკოლის მოსწავლემ აღმოაჩინა, რომ სასკოლო დაფაზე დაწერილ დავალებას ვერ ხედავდა...

- როგორ მოხდა, რომ სწორედ ამ ბიზნესში შეაბიჯეთ და არა სხვაგან?

- საბჭოთა კავშირის რეალობაში სათვალეების არჩევანი თითქმის არ იყო. როდესაც აღმოვაჩინე, რომ მხედველობის პრობლემა მქონდა, მომიწია სტანდარტული ფორმის სათვალეების შეძენა. მზად ვიყავი, გადამეხადა ბევრად მეტი, ოღონდ მქონოდა ისეთი, როგორიც მსურდა, როგორიც მომიხდებოდა, მაგრამ არ იშოვებოდა. სხვებივით მომიწია შეგუება რეალობასთან. ბავშვები, ვისაც მხედველობის პრობლემა ჰქონდა, ისედაც კომპლექსდებოდნენ, არასასურველი ფორმის სათვალე კი დამატებითი პრობლემა იყო. ბავშვობისდროინდელი შეგრძნება და სურვილი, რაღაც შემეცვალა, შემდეგშიც გამყვა და როდესაც ამ ბიზნესში აღმოვჩნდი, ვთქვი: პირველი, რაც უნდა გავაკეთო, ეს იქნება აქცენტი ხარისხზე, დიზაინზე და ბრენდზე. დარწმუნებული ვიყავი, რომ თუ გავითვალისწინებდი ამ კრიტერიუმებს, პროდუქტი ყოველთვის მონახავდა თავის მყიდველს. ბიზნესს ხელი მოვკიდე 90-იანი წლების დასაწყისში. მაშინ „რონიკო“ არ იყო, რა თქმა უნდა. იყო ინდ. მეწარმე, რომელიც იჯდა და თავდაუზოგავად მუშაობდა კოსტავას 10 ნომერში 4 კვადრატულ მეტრ ფართში. სათვალეები მავთულზე გვეკიდა და ისე ვყიდდით. შემდეგ დახლი ავიღეთ შერეულ მაღაზიაში და გავფართოვდით. პირველი კოლექცია, ექსპერიმენტული პარტია იყო ვერსაჩეს ბრენდის, დაახლოებით 100 ცალი ჩამოვიტანეთ და მოსახლეობამ იმდენად აიტაცა ხარისხიანი პროდუქტი, რომ მაშინვე გავყიდეთ. ნელ-ნელა სხვა მაღაზიებშიც ავიღეთ დახლები და განვათავსეთ ჩვენი პროდუქცია. დავიწყეთ შესრულებული სამუშაოს ანალიზი და ფიქრი - რა უნდა გაგვეკეთებინა იმისთვის, რომ ხვალ უკეთესები გავმხდარიყავით. დავამყარეთ კავშირები უცხოელ პარტნიორებთან, დავიწყეთ ტენდენციების გაცნობა, მსოფლიო ოპტიკურ გამოფენებზე სიარული... დაწყება ძალიან რთული იყო, თუმცა ჩვენ გვქონდა ერთი პლიუსი: ზუსტად ვიცოდით, რა მოსწონდა ჩვენს მომხმარებელს, ვიცნობდით მის გემოვნებას. ეს ვიცოდით მაშინაც და ვიცით ახლაც. „რონიკოს“ ნებისმიერ მაღაზიაში ყოველთვის იპოვით თქვენთვის სასურველ სათვალეს.

- თუ კი 23- წლიან მოღვაწეობას პერიოდებად დავშლით, რას მივიღებთ?

- ყველაზე რთული იყო საწყისი პერიოდი, გაცნობის ეტაპი, მაგრამ ის ამავდროულად საინეტერესო აღმოჩნდა. დღეს ჩვენთან მომხმარებელიც და თანამშრომელიც მოდის ბრენდ „რონიკოში“- ეს უკვე სხვა ეტაპია. პოლიტიკური რყევები და სტაგნაციები ჩვენზეც ისახებოდა წლიდან წლამდე, მაგრამ რაც ჩვენზე იყო დამოკიდებული, იმას ყოველთვის პირნათლად ვაკეთებდით და სტაბილურად ვვითარდებოდით. დაარსებიდან დღემდე ვცდილობთ, მხოლოდ სიმართლე ვთქვათ. ჩვენი პრინციპია პატივისცემა მომხმარებლის მიმართ, ჩვენი თანამშრომლების მიმართ (ჩვენთან არიან თანამშრომლები, რომლებიც 22 და 23 წელიამ მოგვყვებიან), მდგრადი პარტნიორული ურთიერთობები და ორიენტაცია- სიახლეებისკენ სვლა, დროულად გაგება და გადმოტანა ჩვენს სივრცეში.

- თქვენ ახსენეთ, რომ განვითარების პირველ წლებში „რონიკოსთვის“ თითოეული ბრენდის შემოტანა დიდი მონაპოვარი იყო, დღეს კი უამრავი შემოთავაზებიდან არჩევთ საუკეთესოს. რას მოიცავს „რონიკოს“ პორტფოლიო დღეს?

- კომპანია დღეს მსოფლიოში საუკეთესო, ტოპ 5-ეულში შემავალი ბრენდების წარმომადგენლია. ჩვენი მთავარი პარტნიორია: ლუქსოტიკა, მარკოლინი, დერიგო, ჰოია, კუპერვიჟენი და მრავალი სხვა. დღეს მსოფლიო ბომონდის მთელი სპექტრი არის „რონიკოს“ ოპტიკურ სალონებში. ჩვენს მაღაზიებში წარმოდგენილია 60-მდე დასახელების პროდუქტი. ჯერ იყო მაღაზიები, შემდეგი ეტაპი - ოფთალმოლოგიური კაბინეტები, კონტაქტური ლინზები, ახლა გვაქვს სასათვალე ლინზები და ნებისმიერი სირთულის შეკვეთას ვიღებთ. სულ მალე „რონიკოს“ ისტორიის მანძილზე 44-ე მსოფლიო გამოფენას ვესტუმრები, სადაც უკვე გაწერილი გვაქვს ყველა შეხვედრა. დღეს უკვე იქმნება მომავალი წლის კოლექციები. ყოველწლიურად ვფართოვდებით და ვხსნით ახალ მაღაზიებს. ბოლო პერიოდში შეგვემატა სამი ახალი ფილიალი „გალერეა თბილისში“, ბათუმში და სულ მალე გაიხსნება რონიკოს სალონი „სითი მოლი გლდანში“.

- დღეს სათვალე კომფორტთან და მხედველობის გაუმჯობესებასთან ერთად, თანამედროვე ადამიანისთვის არის იმიჯიც... 2018 წლის ტრენდი: საითკენ მიდის ოპტიკური ინდუსტრია, რა სიახლეები და ტენდენციები იკვეთება?

- კვლავ რეტრო ბრუნდება, 60-70-იანი წლების ფორმებით. ასევე გარდამავალი, ფერადი ლინზები. ეს წელს ნამდვილად ტრენდულია. ჩემი რჩევა მაინც იქნება, რომ მოდაშია ის, რაც გვიხდება. ყველაზე პოპულარული დღეს მაინც რეიბანია, მისი ეპოქა დგას. ის მთელ მსოფლიოში ნომერ 1 ბრენდია. დღეს სათვალე არ არის მხოლოდ ფუნქციონალური ნივთი, ის იქცა სამკაულად. თუნდაც იმ მასალებიდან გამომდინარე, რითაც ის იქმნება, რამხელა ფანტაზია და ენერგია იხარჯება მის შექმნაზე.

- ისევე როგორც სხვა ნებისმიერ სფეროში, ალბათ თქვენთანაც განვითარებისთვის დიდი მნიშვნელობა ენიჭება კონკურენციას, არის დღეს თქვენი ბაზარი გაჯერებული ჯანსაღი კონკურენციით?

- ჩვენს საფეროშიც ორი სახის კონკურენციაა: ერთი არაჯანსაღი, სამწუხაროდ ბაზარზე არის ისეთი მაღაზიები და ადგილები, სადაც იყიდება ფალსიფიცირებული პროდუქცია. ამას ვერ გავექცევით, ეს პრობლემა საქართველოს გარდა დგას სხვა ქვეყნებშიც და მეორე, როდესაც ღირსეული კონკურენტების გარემოცვაში გიწევს მუშაობა. ამის გარეშე განვითარება არასაინტერესო იქნება.

- სამომავლოდ „რონიკოს“ სტრატეგია როგორია?

- რომ გითხართ, მჯეროდა, რომ ამ სიმაღლეებს მივაღწევდით-მეთქი, მოგატყუებთ, მაგრამ ნამდვილად ვიცოდი - გავაკეთებდით ბევრს. ისევე, როგორც ახლა ვიცით, რომ უამრავი საინეტერესო საქმე გვაქვს წინ. შეგრძნება მაქვს, რომ მთავარს ახლა ვიწყებთ.

გაზიარება:

რონიკო - Ray-Ban-ის სერტიფიცირებული გამყიდველი!

სად შევიძინოთ დადასტურებულად ორიგინალი Ray-Ban?!  მსოფლიოში ყველაზე პოპულარულმა და მოთხოვნადმა სათვალეების ბრენდმა Ray-Ban შექმნა და მთელ მსო...

ნახვა (1090)
კომენტარები (0)

რა სიხშირით უნდა მივმართოთ ოფთალმოლოგს?

მხედველობის დროული შემოწმება აუცილებელია თითოეული ჩვენთაგნის ჯანმრთელობისათვის. დაქვეითებული მხედველობის დროს ძალიან ძნელია სრულფასოვნად განახორციელო სხვადასხვა ელემენტარული ყოველდღიური ქმედება. მაგ: მანქანის მართვა, კით...

ნახვა (6388)
კომენტარები (0)
ონლაინ დახმარება